UMasipala waseMzimkhulu uyaqhubeka nokubamba imihlangano yokubonisana nomphakathi mayelana ne-Integrated Development Plan (IDP), enika izakhamuzi ithuba lokuveza izikhalazo, ukwabelana ngezidingo zazo nokufaka isandla ekuhlelweni kwezinto ezibalulekile ekuthuthukisweni komasipala. Umhlangano wakamuva ububanjelwe e-Ibisi Community Hall, EWARD 11, lapho bekukhona khona iPhini leMeya likaMasipala Wesifunda iHarry Gwala, uCllr Jojozi, kanye nePhini leMeya likaMasipala Wendawo waseMzimkhulu, uCllr Bhekamahlongwa Lukakayi.

Ngesikhathi somhlangano, iPhini leMeya uCllr Lukakayi lethule amaphrojekthi ayecelwe umphakathi eminyakeni eyedlule, laveza nenqubekela phambili eseyenziwe ekufezeni izidingo zezakhamuzi. Libalule ukufakwa kukagesi osebenzisa amandla elanga (solar powered electricity) Kwa-May, okwakucelwe umphakathi ngesikhathi usalinde ukuthola ugesi ojwayelekile. Liphinde lanikeza umbiko ngenqubekela phambili yokwakhiwa kwemigwaqo yangaphakathi emphakathini wakwaJames, esaqhubekayo njengamanje, kanye namanye amaphrojekthi entuthuko. Liphinde lamemezela ukuthi ukwakhiwa kwehholo lomphakathi lakwa-May kuhlelelwe unyaka wezimali ka-2026/2027.

IPhini leMeya likaMasipala Wesifunda iHarry Gwala, uCllr Jojozi, lichaze amaphrojekthi abalulekile ahlobene namanzi nengqalasizinda ahleliwe naqhubekayo eWard 11, okuhloswe ngawo ukwenza ngcono ukutholakala kwezidingo ezibalulekile emphakathini. La maphrojekthi ahlanganisa ukufakwa kwamathangi amanzi angaguquki, amapayipi okusabalalisa amanzi, ompompi bomphakathi kanye nokuvikelwa kwemithombo yamanzi. Liphinde lachaza ngenqubekela phambili yeSigaba Sesibili soHlelo Lokungenelela Lwe-Water Indaba (Water Indaba Intervention Programme), oluhlanganisa ukuhlolwa kwezindawo zokumba imithombo yamanzi, ukumbiwa kwemithombo, ukufakwa kwemishini yokusebenza, ukuhlolwa nokulungiselelwa kwayo ukuthi iqale ukusebenza. Lolu hlelo luphinde luhlanganise ukufakwa kwamaphaneli asebenzisa amandla elanga kanye namathangi amanzi aphakanyisiwe.

Imihlangano yokubonisana ngomphakathi nge-IDP isalokhu iyinkundla ebalulekile yokuqinisa ukubambisana phakathi komasipala nemiphakathi. Ngale mihlangano, izakhamuzi zithola ithuba lokuthola izibuyekezo ngamaphrojekthi avela ezicelweni zazo zangaphambilini, ziphinde ziveze izinselelo nezidingo ezikhona ukuze zifakwe ezinhlelweni zentuthuko zesikhathi esizayo kanye nasekuhleleni ukuhlinzekwa kwezidingo zomphakathi

#doingitforyou